= اشترك ازاي في المعرض 

المشاركة في المعرض بقالها سنتين لا مركزيه يعني كل محافظه هي اللي بتعمل الورش بتاعتها وبتحدد مواعيد المعارض بتاعتها واماكنها 

= طب اروح لمين

الراعي الأساسي في مصر لمعرض العلوم والهندسة هو وزاره التربية والتعليم. يعني مركز التطوير في مديريه التربية والتعليم هوة المسؤول عن الموضوع دة

= ايه هيه مراحل المشاركة في المعرض

علشان تشارك في المعرض لازم تشترك من اول المعرض التمهيدي في محافظتك واللي بيتم على مستوى الإدارة (ودة بتعرف ميعاده من مسؤول المعرض في المحافظة) وبعدها تتأهل للمعرض اللي على مستوى المحافظة ومنه لاحد المعارض التلاته النهائية على مستوى الجمهورية وهيتم اختيار 10 مشروعات منهم تمثل مصر في المعرض النهائي في أمريكا

= لازم يكون عندي فكره علشان أقدر أشارك

بيتم عمل ورش عمل على مستوي المحافظات لو حابب تعرف ازاي تجيب فكره تعرف مواعيدها بردة من مسؤول المعرض في محافظتك

= ايه شروط المشاركة

أي طالب بيدرس في مدرسه داخل مصر (حكومي، تجريبي، فني، انترناشونال، خاص) يقدر يشارك بشرط انه ما يكونش في جامعه

السن الرسمي للتمثيل بره مصر هوة من 14 الى 21 سنه بشرط يكون في التعليم ما قبل الجامعي وفي الصف الثالث الاعدادي فيما فوق 

مسموح بالمشاركة لمن هم تحت السن ويقدروا ينافسوا عل الجوائز الخاصة

= لازم أكون لوحدي ولا مسموح بالفريق 

تقدر تشارك لوحدك في مشروع او تكون فريق بحد اقصى 2 طلاب اجمالي العدد (لو أحد أعضاء الفريق تحت السن يعتبر الفريق تحت السن)

= ينفع أشارك اكتر من مرة او بأكثر من مشروع

المشاركة في المعرض بتتم مرة واحدة فقط (ركز كويس علشان تقدر تعدي للمرحلة اللي بعدها)

غير مسموح بالمشاركة بأكثر من مشروع في المعرض 

=هل ممكن الفريق يبقى من اكتر من محافظة؟

ايوه ممكن إذا كان هناك أسلوب للتواصل بينكم.

 = لازم يكون عندي مشرف 

بما أنك لسه طالب في مدرسه لازم يكون في حد كبير مسؤول عنك في المعرض ولازم يكون من التربية والتعليم ودة المشرف التربوي ... لو مش لاقي مشرف خلي مسؤول المحافظة يساعدك بانه يوفر لك مشرف 

= انا عندي قريبي او أخويا دكتور او مهندس وهوة المشرف بتاعي 

طبعا المشرف الأكاديمي دة حاجة كويسه وهوة الجندي المجهول اللي ساعدك في مشروعك ومش هنقلل من حقه الادبي في الاشراف على مشروعك ... لكن بردة لازم يبقى نعاك مشرف تربوي من التربية والتعليم يكون مسؤول عنك في المعرض

= علي أي أساس بيتم اختيار المشروعات

بيتم اختيار المشروعات على أسس معايير عالميه متفق عليها و هي

-         سؤال البحث و المشكلة

-         التصميم و المنهجية

-         التنفيذ و البناء و الاختبار و جمع البيانات

-         الابداع في المشروع

-         تصميم و محتوي لوحه العرض 

-         المقابلة مع المحكم

= ايه مجالات المعرض

المعرض مكون من 22 مجال مختلف تقدر تشترك فيه , المجالات دي مقتسمه الى مجالات خاصه بالتصميم الهندسي  و مجالات خاصه بالبحث العلمي

اعرف اكتر عن مجالات المعرض من الرابط دة 

 = ايه الفرق بين التصميم الهندسي و البحث العلمي 

العلماء دايما بيدرسوا الظواهر و بيلاحظوا و بيستنتجوا النظريات و يحطوا القوانين لكن المهندسين بيقوموا بتصميم المنتجات بناء على هذه القوانين و النظريات يعني لو هدف مشروعك عمل منتج جديد او برنامج معين بيساعد على تنفيذ مهمه ما  يبقى المشروع بتاعك تصميم هندسي

 = ايه هوه الماكيت , البروتوتايب  و الفرق بينهم

الماكيت هو نموذج توضيحي بيوضح شكل التصميم بتاعك و لكن مش بيشتغل و بيستخدم لتوصيل الفكره و ممكن يكون مصنوع من أي خامه ( خشب , فلين , بلاستيك ..... ) و ممكن يكون تصميم باستخدام احد برامج الكمبيوتر 3D

البروتوتايب او النموذج الاولي دة بيكون تصميم مبدئي من الجهاز او التصميم بتاعك و بيكون بيشتغل  و بيأدي المهمة المطلوبه منه كامله او جزء منها

= ايه افضل حاجه للوحه العرض  العربي ولا الإنجليزي  

مش هتفرق في أي حاجة المهم تكون بتوضح مشروعك و انت تقدر توظفها كويس في شرحك